Lysholsætra ligg ca 1,5 km ovanfor garden. Ein restaurert sæterveg går frå tunet vårt og slyngar seg opp fjellsida, og endar på Lysholsætra. Vegen vart bygd i 1912 og utbetra mykje i 1945. DEn er oppgradert med jamne mellomrom, seinast i 2009. Det er no god traktorveg heilt opp. Ca. 300 meter før sætra så ligg det restar etter bergverksdrift av kopar. Denne staden vert kalla Koparhola. Det var i 1881 at denne gruva med 12-15 innslag var driven av Bastian Jacobsen Aure, men drifta gjekk dårleg sidan det var ulendt og veglaust på denne tida. 

På Lysholsætra var det vanleg med 8 veker med sæterdrift med mjølking. Denne drifta tok truleg slutt på 50 talet. Det er no berre 1 sel som står igjen av dei 5 tidlegare bygningane, og det er vårt sel. Også i dette selet har det vore mjølking i kjellaren, og det var restar av båsar der før, sjølv om takhøgda er berre ca 1,-1,6 m.

Det er og fint turterreng i tilknyning til sætra med Hinakken som næraste fjell med sine 432 m over havet. Ein kan ellers gå vidare til Eidem, Grebstad og Hjellane via turstiar, samt til Vassætra. 

Andre fjellturar i nærleiken er til Storevarden (645m) og Sandvikshornet (876 m).